गजल: कहिले त एकोहोरो बिरहमा लेख्छु गजल:: अनुराग-अनुरागी मन

कहिले त एकोहोरो बिरहमा लेख्छु गजल
कति कुरा आनन्दका संग्रहमा लेख्छु गजल

कठै भन्ने को नै छ र ? अनि व्यथा देखाउनु
नदुखे झैँ बरु खुशी सरहमा लेख्छु गजल

गुम्साएरै राख्छु शब्द मनै त हो कहाँ मान्छ ?
बाध्य हुन्छु भावनाको आग्रहमा लेख्छु गजल

एकै ढिक्को पार्छु अनि छताछुल्ल बनाउँछु,
उही मर्म समास र बिग्रहमा लेख्छु गजल

कल्पिन्न म मीठामीठा सोचे जस्तो हुन्न नि त
जे जे भोग्दै जान्छु सोही तरहमा लेख्छु गजल


रचना: अनुराग 'अनुरागी मन'
रचना मिति : एप्रिल ६, २०११, दक्षिण कोरिया