गजल: सञ्जालसरी सम्बन्धको जमातमा एक्लो छु म- अनुराग 'अनुरागी मन'

सञ्जालसरी सम्बन्धको जमातमा एक्लो छु म
हाँसीदिए सबै हाँस्छन् आघातमा एक्लो छु म

स्वप्नील दुनियाँ त आहा ! कति रमाइलो
बिडम्बना ! नब्युँझिंदै प्रभातमा एक्लो छु म

मेरो को छ ? सोच्नु पर्छ खै कोतिर इंगित गरुँ ?
आफ्नो भनी दाबी गर्ने औकातमा एक्लो छु म

यौवनको मीठो सगुन हजारौं छन् लिनेदिने
यता आफ्नै जवानीको सौगातमा एक्लो छु म

एक्लोपनको आगो लाग्दा तातो आँशु खस्दछ नै
टीठलाग्दो यो दृश्यको हालातमा एक्लो छु म

एकै निमेष काट्न पनि मुश्किल छ साथी बिना
लाग्छ सिङ्गो जिन्दगीकै मौज्दातमा एक्लो छु म


रचना: अनुराग 'अनुरागी मन'
रचना मिति : मे २४, २०११, दक्षिण कोरिया