गजल: मैले मरिहत्ते गर्दा उ बेलामा भाउ खोज्ने- अनुराग "अनुरागी मन"

मैले मरिहत्ते गर्दा उ बेलामा भाउ खोज्ने ?
मेरै मन दुखाउन चरम घाती दाउ खोज्ने ?

आँखै चिम्ली चोटहरु कति दियौ हेक्का छैन
आज आइ सुम्सुम्याइ त्यै पुराना घाउ खोज्ने ?

प्रेमपत्र सँगसँगै हृदय नै धुजा पार्यौ
तिनै मर्म फेरि जोड्न टुक्रिएका ताउ खोज्ने ?

सजिलोमा पछि पारी स्वार्थ बोकी अघि लाग्यौ
डुब्ने भान हुँदा मात्रै सहाराको नाउ खोज्ने ?

मेरो हृदयमा सधैँ तिम्रो उच्च बास थियो
हिजो शीर लत्याएर आज तुच्छ पाउ खोज्ने ?


रचना: अनुराग 'अनुरागी मन'
रचना मिति : .......... २०११, दक्षिण कोरिया